මෛත්‍රී SLFP සභාපතිකමෙන් බම්බු ගහන්න එපා

උඹට රනිල්ව අගමැති කරන්ඩ ඕන නම් ශ්‍රිලනිප සභාපතිකමේ බම්බු ගහපන් යැයි වාසු කියා තිබුණේය. වාසු කියපු විදියට නැතත් පුරවැසියන් විදියට අපිත් කිව යුත්තේ ශ්‍රිලනිප සභාපතිකමේ බම්බු ගහන්නැතුව අයින්වෙයන් කියාය. ( ඇයි බං ශ්‍රිලනිප සභාපතිකම මෛත්‍රිට වැඩක් නැහැනේ. එයාට දේශපාලන අනාගතයක් නැහැනේ.. අවුරුදු  පහක් ඉඳලා විශ්‍රාම යනව කියලනෙ කිව්වේ. මේක කලින් සටහනකින් කිව්වා. මේ තියෙන්නේ)

වාසු කිව්වේ රනිල්ට අගමැතිකම දෙන්න ඕනනම් බම්බු ගහපන් කියාය. අප කිව යුත්තේ උඹ ශ්‍රිලනිප දිනවන වගකීමක් කරගහගන්නේ මොකද? ඕක බාරදීලා නිර්පාක්ෂික ජනාධිපති කෙනෙක් වෙයන් කියාය. ශ්‍රිලනිපයට ආකර්ශණීය නායකයෙක් ඔවුන් සොයාගනු ඇත. (මහින්ද වුණත් කමක් නැහැ. මහ ඡන්දෙකදී රිදෙන්න දෙන්න පුළුවන් මහින්ද ආවොත්)

ජනවාරි අටවෙනිදා මෛත්‍රීට පැවරුණේ පක්ෂයක වගකීමක් නොව ජාතියක වගකීමකි. එහෙත් මෛත්‍රීත් එජාපයත් හැමෝමත් කරන්නේ උඩින් පල්ලෙන් ජාතික වගකීමේ කෑලි කෑලි ඉටුකරමින් තමන්ගේ වුවමනාවන් වෙනුවෙන් වැඩ කිරීමය. (බම්බු ගහනව)

මෛත්‍රී ගැනවත් රනිල් ගැනවත් මහින්ද ගැනවත් (ඇයි යකෝ) අනුර කුමාර ගැනවත් නොව දේශපාලනයේදී පුරවැසියන් තමන් ගැනම විශ්වාසය තැබිය යුතුය. (දේශපාලඥයො නෙවෙයි දේශපාලනය විශ්වාස කරන්න)

ජනවාරි අටෙන් පස්සේ දැන් ප්‍රගතිශීලි යැයි කියන පිරිසත් ඇතුළු සියළු දෙනාම කිසියම් දේශපාලන බලවේගයක් ගැන විශ්වාසය තබන්නට පටන් ගෙන ඇත. (මහින්ද, රනිල්, මෛත්‍රී, ජේවීපී, ෆොන්සේකා බ්ලා බ්ලා බ්ලා)

 මෙතැන මට කියන්නට තියෙන්නේ යුද්ධයත් රාජපක්ෂ යුගයත් ජනවාරි අටවැනිදාත් දින සීයත් පුරවැසියන්ට ඉගැන්වූයේ වෙනත් පාඩමක් බවය. 94දී හරියට පාඩම ඉගෙන නොගෙන චන්ද්‍රිකාවත් ශ්‍රිලනිපයත් විශ්වාස කොට අපි වසර විස්සක් නාගත්තෙමු. (දේශපාලඥයො නෙවෙයි දේශපාලනය විශ්වාස කරන්න)

මේ ලිව්වේ අපි හොඳින්ම දන්නා සත්‍යයක් මිස අළුත් දෙයක් නොවේ. කළ යුත්තේ කුමක්දැයි අපි හෙමිහිට සාකච්ඡා කරමු...