ෆෙඩරල්????????????

මේ වනවිට නැවතත් කොටි, ත්‍රස්තවාදීන් වැනි වචන සමඟ යන පුවත් දිවයින ඇතුළු ජාතිවාදී පත්තරවල ඉදිරියට එන්නට පටන් අරන්. ගෙවුණු සතියේ දිවයින පළමු පිටුවේ පළවූ මේ වර්ගයේ පුවත් ප්‍රමාණය විස්සකට ආසන්න වෙනවා. එම පුවත් ඒක පාර්ශ්වීයයි මෙන්ම සීයට අනූවක් පුවත් සොයා බැලීම්වලදී කෙප්ප බව හෙලිවෙනවා. දිවයින පාර්ශ්වීයව හා මාධ්‍ය සදාචාරය නොතකමින් ලියූ මෙවන් පුවතක් තමයි සම්බන්ධන් කිළිනොච්චියේ හමුදා කඳවුරකට බලෙන් ඇතුළු වූවායැයි ආර්. සම්බන්ධන් පිළිබඳව පොලීසියට පැමිණිල්ලක් ලැබී ඇති බව. ඒ පුවත පාවිච්චි කරමින් ඒකාබද්ධ විපක්ෂ නඩය බෙරිහන් දුන්නේ පුළුවන්නම් සම්බන්ධන්ව අත්අඩංගුවට අරන් පෙන්වන්න කියායි. ෆේස්බුක් නඩය හතුරෙක් හමුදා කඳවුරුවලට ඇතුළු වුණාක් මෙන් පරල වී තිබුණා. ආර් සම්බන්ධන් කියන්නේ ශ්‍රී ලංකාවේ පුරවැසියන් කණ්ඩායමක් විසින් ඡන්දයෙන් පත් කරගත්ත ශ්‍රී ලංකා පාර්ලිමේන්තුවේ විපක්ෂ නායකවරයා මිස කේතලයක් නෙවෙයි. කේතලයක් මෙන් අනුන් පාවිච්චි කරන විදියට හැසිරෙන්නත් දෙවැනි පන්තියේ විදියට ජීවත් වෙන්නත් අවශ්‍ය නැහැ. 

ඔවුන් කරන කියන දේවලට පහුගිය දිනවල ගෙන ආ විවේචන වලින් කරන්නේ සම්බන්ධන්ව පමණක් නොව ඔවුන්ට ඡන්දය දුන් මිනිසුන් කොට්ඨාශයම ප්‍රතික්ෂේප කිරීමයි. කිළිනොච්චිය හමුදා කඳවුරට සම්බන්ධන් බලෙන් ඇතුළු වී තිබුනේ නැහැ. ඔහු ඒ ප්‍රෙද්ශයේ නිරීක්ෂණය සඳහා ගමන් කරන විට හමුදා කඳවුර දෙසට ගිහින් තියෙනවා. ආරක්ෂක රථවලින් යද්දී හමුදා කඳවුරෙන් ගේට්ටුව හැර තියෙනවා. ඇතුලට ගොස් වාහනයෙන් බසින විට සම්බන්ධන් යැයි දැක හමුදා නිලධාරීන් ඔහු ඇතුලට පැමිණීම ගැන ප්‍රශ්ණ කර තියෙනවා. ඔහු කිසිවක් නොකියා ආපසු ඇවිත්. මේ ගැන මා එක්ක කතා කළ හිටපු ආණ්ඩුවේත් සිටි එක් ඇමතිවරයෙක් කීවේ තමන් නිතර හමුදා කඳවුරුවලට හිටිගමන් ගොස් තියෙන බව. එසේ යද්දී ගේට්ටු විවෘත කරන බවත් ඒ පුරුද්දට ගේට්ටු විවෘත කර තිබුණත් පැමිණියේ සම්බන්ධන් යැයි දැක මෙවර බැණවදින්නට ඇති බවත් ඔහු කියන්නේ. හැමවිටම මේ මිනිසුන්ව දෙවැනි පන්තියට දමා සැලකීම සිදුවෙලා තිබුණේ. 

මේ සිදුවීමෙන් පස්සේ සුමන්තිරන් විසින් පැවැත්වූ මාධ්‍ය සාකච්ඡාවේදීත් මාධ්‍යවේදීන් ප්‍රශ්ණ අහන්නේ ඉතාම අවිනීත ලෙසින් දෙමළ ජාතික සන්ධානය එක්ක වෛරයෙන් වගේ. මේ සිදුවීම්ම ප්‍රමාණවත් මේ මිනිසුන්ව දෙවැනි පන්තියට දමා කල්පනා කිරීමට බහුතර ජාතිය ප්‍රියකරන බව. බලතල බෙදිය යුතු බවට මීට වඩා සාධක මොනවාද?

සම්බන්ධන් මහතා ඇතුළු දෙමළ ජාතික සන්ධානයේ දේශපාලන මතවාදයත් පීඩිත දෙමළ ජනතාව වෙනුවෙන් පෙනී නොසිටීම පමණක් නෙවෙයි මතවාදීව ප්‍රබල දේශපාලන මැදිහත්වීමක් කරන්නට නොහැකි වීමත් වගේ නොයෙක් කාරණා ගැන ටීඑන්ඒ ගැන මට විවේචන තියෙන බව ඇත්ත. ඒත් මට එක් කාරණයක් සම්බන්ධයෙන් මේ අය ගැන ගෞරවයක් තියෙනවා. බලන්න සුමන්තිරන් පැවැත්වූ මාධ්‍ය සාකච්ඡාව... ඔහුව දෙකේ කොළයට දමමින් ඉතා නින්දිත ලෙස මාධ්‍යෙව්දීන් ප්‍රශ්න කරද්දී ඉවසීමෙන් කතා කරන ආකාරය. ඔහු විතරක් නෙවෙයි සම්බන්ධන් පවා ඉතා පරිණත විදියට ඉවසීමෙන් කතා කරනවා... හිරු ගොසිප් වෙබ් අඩවිය එක්ක ඔහු කරන ඉන්ටවීව් එකේදී පවා ඒක පේනවා. ඉවසීමෙන් කතා කරනවා කියන එකෙන් මම අදහස් කළේ නිවුණු ස්වරයෙන් හෙමින් කතා කරනවා කියන එක නෙවෙයි... ඇත්තටම මේ ජරා සැලකීම් ප්‍රමාණයෙන් බහුතර ජනවර්ගය තුළින් එද්දී සුළුතර ජනවර්ගයක් කොහොම ඉවසන්නද? ගෞරවය වෙනුවෙන් යුද්ධ කර මියයෑම යහපත් නෙවෙයිද? ඒත් සම්බන්ධන්ලා තාමත් එක රටක ජීවත් වෙන්න සූදානම්.... විපක්ෂ නායක ධූරය භාරගනිමින් ශ්‍රී ලංකා රාජ්‍යය හා එහි ව්‍යවස්ථාව පිළිගන්න ඔවුන් සූදානම්... එක රටක ජීවත් වෙද්දී බහුජාතියේ  මාන්නය එක්ක ඔවුන්ගෙන් එන හිරිහැර වලින් ආරක්ෂා වෙන්න අවශ්‍ය ව්‍යවස්ථා රාමුවකුයි ඔවුන් ඉල්ලන්නේ... (භාෂාව හැසිරවීමේ අපහසුව නොසලකන්න තරම් ඔබ දියුණුයි කියලා හිතනවා )

ෆෙඩරල් දෙනවා කියලා වචනයක් ව්‍යවහාර වෙනවා... ෆෙඩරල් දෙන්න ඒක හිඟන්නාට දෙන රුපියල් දහය වගේ එකක් නෙවෙයි... ෆෙඩරල් හෝ බලය බෙදීම කියන්නේ දෙමළ ජනතාව සිංහලයන්ගෙන් හිඟා කන දෙයක් නෙවෙයි... දෙමළ ජනතාවගේ මතය... ඒකට ගරු කරන්න බැරි පාහර ජාතියක් එක්ක කොහොමද එක රටක ජීවත් වෙන්නේ?????? 

ෆෙඩරල් නම ඇතිව හෝ නැතිව බලතල බෙදුණු ආණ්ඩුක්‍රමයක් කියන්නේ ජනතාවගේ ඉල්ලීමක්. ඒ වෙනස සුළුජාතීන්ට පමණක් නෙවෙයි දුර ඈත පළාත්වල සිටින බහුතර ජනවර්ගයට අයත් පුරවැසියන්ටත් හොඳයි. නව ආණ්ඩුක්‍රම ව්‍යවස්ථාවක් ගැන යෝජනා ඉදිරිපත් කරන මෙවන් මොහොතක ඕනෑම යෝජනාවක් කරන්නට අයිතිය ඕනෑම කෙනෙක්ට තියෙනවා. ආණ්ඩුවේ වගකීම ඒවා සලකා බැලීම. ඒත් ෆයිසර් මුස්තාෆා ඇමතිවරයා කියා තිබුණේ කිසිදා ෆෙඩරල් ක්‍රමයක් ඇති කරන්නට කටයුතු නොකරන බවයි. ශ්‍රිලනිපය ෆෙඩරල් ගැන සාකච්ඡාවකටවත් සූදානම් නැහැලු. ආණ්ඩුවේ විවිධ ඇමතිවරුත් මේ අදහස ඇතිවන කතා කියා තිබුණා. එහෙනම් ව්‍යවස්ථාව ගැන ජනතා අදහස් විමසන්නේ මොකටද? ව්‍යවස්ථා වෙනසක් ගැන විවෘතව බලන්නේ නැද්ද? ෆෙඩරල් ගැන දන්නේ නැද්ද? ෆෙඩරල් ආණ්ඩුක්‍රමයක් නිසාම යුද්ධ ඇතිවුණු හෝ බෙදීගිය රටවල් වලට උදාහරණ තියෙනවාද? මේ ෆෙඩරල් විරෝධී උඩුබුරලීම් වල පදනම මොකක්ද? ව්‍යවස්ථාවෙන් ජනවාර්ගික ගැටලුවට ස්ථීර විසඳුමක් දෙනවායැයි කීවේ බොරුවටද?

ෆෙඩරල් ගැන බොරු කතා කීවත් ෆෙඩරල් නිසා රටක් බෙදුණු බවට කොහේවත් උදාහරණයක් නැහැ.. ෆෙඩරල් නිසා නොබෙදී තිබුණු රටවල් ගැන තමයි උදාහරණ තියෙන්නේ. 

ෆෙඩරල් වලට එකඟ කෙනෙක් වුණත් නැති වුණත් දෙමළ ජනතාව නියෝජනය කරන අයගේ යෝජනාවක් ගැන කතා කරන්නවත් සිංහල ජනතාව නියෝජනය කරන දේශපාලඥයන් සූදානම් නැත්නම් ඒකෙ අදහස මොකක්ද? ඒකට ඇහුම්කන් දෙන්නවත් සූදානම් නැත්නම් එක රටක මේ ජාතීන් දෙකට ජීවත් වෙන්න පුළුවන්ද????