Saturday, September 23, 2017

විජේ සේදුපතිත් බැලිය යුතු තරමනී



පෙම්වතිය කෝටි තුනක ණයක් ගෙන ඇමරිකාවට පලා ගොස් තමන්ව රවටා වෙන පෙම්වතෙක්ව සොයාගත් පසුව විරහවෙන් සහ පෙම්වතිය වෙනුවෙන් කළ අපරාධයක තැවීමෙන් අනාගතය අඳුරු කරගත් තරුණයෙක් මහා වැස්සකට හසුවෙයි. ඔහුලේ නම ප්‍රභූය. පාළු මාවතක සෙවණකට වී සිගරැට්ටුවක් උරමින් කොණ්ඩය හා රැවුල ‘බමුණෙක් මෙන්‘ වවාගත් ඔහු සිටියි. තම සැමියාගේ සමකාමියෙකු බව හඳුනාගැනීමෙන් පසුව ඔහු පිළිබඳව තේරුම්ගෙන ගැටුමකින් තොරව අවබෝධයෙන් සැමියාගෙන් වෙන්වුණු, ඒ විවාහයෙන් කුඩා පුතෙක්ද සිටින තරුණියක්ද ඒ වැස්සට මුවා වෙන්නට එතැනට පැමිණෙයි. ඇගේ නම අල්ඩියා ය.

 




තමන්ගේ අතීතයන් ගැන දෙන්නා අතර ඇතිවන සංවාදයෙන් පසුව දෙන්නා අතර මිත්‍රත්වයක් ඇරඹෙයි. මිත්‍රත්වය ආදරයකට පෙරළෙයි. දෙන්නා එක්ව ජීවත්වෙන්නට පටන්ගනියි. එහෙත් ඇගේ ලොක්කා ඇගෙන් ලිංගික වාසියක් ගනු පිණිස ඇයට කෙටි පණිවුඩයක් එවයි. එය දකින ප්‍රභූ අල්ඩියා සහ ලොක්කා අතට සම්බන්ධයක් ඇතැයි සැක කරයි. සැකය දුරදිග ගොස් දෙන්නා වෙන්වෙයි. සිදුවීම් රැසක් විසින් අල්ඩියා මෙන්ම ප්‍රභූ තමන්ගේ සම්බන්ධය පිළිබඳව යළි සිතා බලන්නට යොමු කරවයි.
මේ 2017 වසරේ අගෝස්තුවේ තිරගත වූ දෙමළ චිත්‍රපටියක් වන තරමනී චිත්‍රපටියේ කතා සැකිල්ලයි. රාම් විසින් අධ්‍යක්ෂණය කළ, යුවන් ශංකර් රාජා විසින් සංගීතය නිර්මාණය කළ තරමනී චිත්‍රපටිය විශාල විචාරක ප්‍රතිචාර මෙන්ම ප්‍රේක්ෂක ප්‍රතිචාරද ලැබීය. තරමනී චිත්‍රපටය තේමා කරගෙන ඇත්තේ බිරින්දෑවරුන් සහ පතිවත පිළිබඳවයි. කාන්තාවන් ගැන සමාජගත වී ඇති ආකල්පන මෙන්ම පිරිමින්ගේ සැකය මැද කාන්තාවන් විඳින පීඩාවන් චිත්‍රපටියට තේමා කරගත් වස්තුබීජය වී ඇත.
අල්ඩියා විවෘත මනසක් ඇති කතක් වුවත් ලිංගික සම්බන්ධතාවලට උනන්දුව නොදක්වන තරුණියකි. එහෙත් ඇයව ‘දැලේ දමාගෙන‘ ලිංගික වාසියක් ගන්නට බොහෝදෙනෙකු පෙළඹෙයි. සමාජ මාධ්‍ය, කාර්යාලය ඇතුළු සැමතැන එසේය. ප්‍රභූ ඇය වෙත ළංවෙන්නේ සැබෑ ආදරයෙනි. එහෙත් ප්‍රභූ ඇය වටා වටවෙන අනෙක් පිරිමින් දකිද්දී ඇගේ ‘චරිතය‘ ගැන සැක පහල කරගනියි. අනෙක් පිරිමින් ඇයට ළංවෙන හේතුව නිසාම ඔහු ඇගෙන් ඈත්වෙයි. ප්‍රභූ ඉන්පසුව අල්ඩියාගෙන් පළිගන්නට මෙන් විවාහක කතුන් කිහිපදෙනෙකු සමඟම ‘අනියම්‘ සම්බන්ධතා ඇති කරගනියි. එහෙත් ඒ සියළුදෙනා අල්ඩියා මෙන් නොව බාහිර රූපයෙන් සංස්කෘතික කාන්තාවන්ය. සාරි හැඳගත්, සැමියන්ගේ විශ්වාසය දිනාගත් බිරින්දෑවරුන්ය. 

කුතුහලයෙන් පිරුණු සිදුවීම් රැසක් අවසානයේදී ප්‍රභූ තමන් ගැනත් අල්ඩියා තමන් ගැනත් යළි කල්පනා කරන්නට පටන්ගනියි. එකිනෙකට වෙනස් අදහස්වලින් යුතු දෙන්නා යළි එක්වෙන්නට පසුබිම සලසන්නේ මේ අත්දැකීම්ය. 

මෙය මීට පෙර අධ්‍යක්ෂණය කළ චිත්‍රපටි දෙකකින්ම හොඳ අවධානයක් දිනාගත් හැකියාවෙන් පිරිපුන් අධ්‍යක්ෂවරයෙක් වන ‘රාම්‘ගේ තෙවැනි චිත්‍රපටියයි. ඔහුගේ පළමු චිත්‍රපටිය තිරගත වුණේ 2007 දීය. දෙවැනි චිත්‍රපටිය 2011 දී තිරගත විය. තෙවැනි චිත්‍රපටිය 2017 දීය. වසර කිහිපයක පරතරයක් තබාගෙන වෙහෙස වී නිර්මාණයක් අවසන් කරන තවත් අධ්‍යක්ෂවරයෙක් ලෙස රාම් හැඳින්විය හැකිය. ඔහු ගෙන ඇති කාලය කිසිසේත් අපතේ ගොස් නැත. චිත්‍රපට තුනම විචාරක ප්‍රතිචාර මෙන්ම ප්‍රේක්ෂකයන් අතරද සාර්ථකත්වය අත් කරගත් ඒවාය. 

චිත්‍රපටියෙහි ප්‍රධාන චරිත රඟපාන්නේ ඇන්ඩ්‍රියා ජෙරමියා සහ වසන්ත් රවී විසිනි. රාම් විසින් ඇන්ඩ්‍රියා ජෙරමියාහ්ව මේ චිත්‍රපටියේ ප්‍රධාන චරිතයට තෝරාගනිද්දී ඇය රංගන ශිල්පිනයක ලෙස අඩු අවධානයක් දිනා සිටි හැකියාවෙන් පිරිපුණු තරුණියක් විය. ඔහු මේ චිත්‍රපටියේ කේන්ද්‍රීය චරිතයට ඇන්ඩ්‍රියාව තෝරාගනිද්දී කියා තිබුණේ ඇන්ඩ්‍රියාගේ ජීවිතයේ හැරවුම් ලක්ෂයක් බවට චිත්‍රපටිය පත්වෙනු ඇති බවයි. චිත්‍රපටිය තිරගත වෙද්දී ඇය කමල් හසන්ගේ චිත්‍රපට දෙකක්, මෝහන්ලාල්ගේ චිත්‍රපටියක් ඇතුළුව චිත්‍රපට රැසකින් අවධානය තමා වෙත යොමු කරගෙන තිබුණත් තරමනී චිත්‍රපටියේ ඇය මැවූ චරිතය ඇගේ රංගන දිවියේ හැරවුම් ලක්ෂයක්ම වනු ඇත. ඇය ඉතා ප්‍රබල ලෙස තමන්ගේ සලකුණ කතාව තුළ තබයි.

අනෙක් පැත්තෙන් වසන්ත් රවී සිටියි. ඇන්ඩ්‍රියා චිත්‍රපටියේ කේන්ද්‍රීය චරිතය වෙද්දී ප්‍රධාන පිරිමි චරිතය ඉදිරිපත් කිරීමේ වගකීම වසන්ත් රවීට පැවරෙයි. ඔහු වෛද්‍ය උපාධිය ලැබූවෙකි. ඉන්පසුව සිනමාවට පැමිණීමේ ආසාව නිසා වෛද්‍ය වෘත්තිය අත්හැර පසුවී සිනමාවට පැමිණියෙකි. තරුණ කාලයේ රංගනය හැදැරූ අයෙකි. එක් විදියකට එය සමාන වෙන්නේ ගණකාධිකාරී වෘත්තිය අත්හැර පසුවී රංගනයට පැමිණි විජේ සේදුපතිටය. වසන්ත් රවී සුවිසල් අනාගතයක් ඇති අතිදක්ෂ තරුණයෙක් බව ඔහුගේ රංගනයෙන් පෙනෙයි. රාම් වැනි අධ්‍යක්ෂවරයෙක් සමඟ වැඩ පටන්ගන්නට අවස්ථාව ලැබීම ඔහුගේ වාසනාවකි. වසන්ත් රවී කිහිපවතාවක්ම කියා ඇති පරිදි රංගනයේදී ඔහු වඩා ප්‍රිය කරන්නේ විජේ සේදුපතිටය. ජනප්‍රිය, ජනප්‍රිය නොවන, වේගවත් මන්දගාමී ඕනෑම චිත්‍රපටියක ප්‍රධාන චරිතය නොවන චරිතයක් වුව බාරගන්නට තමා සූදානම් බව මාධ්‍ය සාකච්ඡාවලදී වසන්ත් රවී පවසා ඇත. ඔහු දෙමළ සිනමාව තුළ වැදගත් යමක් කරනු ඇතැයි සිතිය හැකිය.

චිත්‍රපටිය තුළ කතාබහ කරන මාතෘකාව මෙන්ම චිත්‍රපටියේ ගලා යෑමත් රසවත්ය. ඒ නිසා පැය දෙකහමාරක පමණ දිගින් යුතු වුණත් චිත්‍රපටිය නැරඹීම ගැන පසුතැවිලි විය යුතු නොවේ. රාම්ගේ තිරරචනය මෙන්ම අධ්‍යක්ෂණය, යුවන්ගේ සංගීතය මෙන්ම ඇන්ඩ්‍රියා සහ වසන්ත්ගේ රංගනය නිසා සිනමා රසිකයෙකු තරමනී මඟ හැරිය යුතු නැතැයි සිතේ.

7 comments:

  1. නිකන් ලැබුණු නිසා දෙමළ චිත්‍රපට දෙකකම මුල විනාඩි 5 බැගින් බැලුවා.


    නම් නම් මතක නැහැ.

    එකක කොල්ලේක් කඹය දිගේ පල්ලෙහාට බැහැලා අර ලොකු බඹර වදයක් කඩනවා. අනිකේ රාජාලියෙක් දැවිල්ල පරවියෙක් මරණවා.

    ReplyDelete
  2. ලියල තියෙන විදිහට බලන්න උනන්දුවක් ඇති වෙනවා. මෙයට කෙළින්ම අදාළ නැති ප්‍රශ්නයක්. දකුණු ඉන්දියාවේ ජනප්‍රිය දෙමළ චිත්‍රපට රිලීස් කරන කොටම ඒවා ලංකාවේ හෝල් වලටත් (දෙමළ අය වැඩිපුර ඉන්න පැති වල) එනවද? නැත්නම් කාලයක් යනවද?

    ReplyDelete
  3. ගොඩක් වෙනස් විදිහේ දෙමල චිත්‍රපටියක්.ඒ වගේම හොද කතාවක්.

    ReplyDelete
  4. හොඳ චිත්‍රපට කතාවක්. මේ චිත්‍රපටි සබ්ටයිටල් එක්කද එන්නේ.

    ReplyDelete
    Replies
    1. http://www.baiscopelk.com/taramani-2017-with-sinhala-subtitles/

      Delete
  5. කතාව අනුව නම් හොඳයි වගේ. බලන්න ඕනේ! තෑන්ක්ස් Rekha

    ReplyDelete
  6. හොඳයි වගේ.ඒත් සබ් ටයිට්ල් නැතුව බලන්ඩ බෑනේ.

    ReplyDelete