අඩෝ රනිල, පොලිසිය එක්ක පිස්සු කෙළින්න එපා....

ප්‍රජාතන්ත්‍රවාදය හා යහපාලනය මාස හයකින් උදා වී ඇතැයි අගමැති රනිල් සහ ඇමතිවරුන් තැන් තැන් වල කියමින් යයි. පොලිසියත් ස්වාධීන වී ඇතැයි ජෝන් වැල් ජෝන්ලා කියමින් යයි. මෑත දිනයක හමුවූ කොළඹ පැත්තේ පොලිස් නිලධාරියෙක්ද කීවේ පෙර තිබුණාට වඩා දැන් නිදහසක් තිබෙන බවයි. මෙය සාපේක්ෂව අල්ලා ගත්තේ නැතිනම් තව ටික කළෙකින් යූඇන්පී ආණ්ඩුව ස්ථාවර වූ පසු අපට සිදු වන්නේ නැවතත් අර නිදහස නැතැයි කියමින් දුක් වන්නටය.

ප්‍රධාන පක්ෂ දෙක අනෙකාගේ වැරදි මාරුවෙන් මාරුවට පෙන්වමින් වසර හැටහතක් ලංකාව පාලනය කොට තිබේ. ඔවුන් උදා කළ ප්‍රජාතන්ත්‍රවාදයක් නැත. අප ලබා ගත යුත්තක් මිස ඔවුන් උදා කර දෙන්නක් නොවේ ප්‍රජාතන්ත්‍රවාදය.

 අප මහින්ද විරෝධී නිසා රනිල්වාදී වුවහොත් වන්නේ ඉඟුරු දී ඉඟුරුම හෝ මිරිස් ගත්තා වීමය. (දැන් වෙලාවේ හැටියට නම් රනිල් මහින්දට වඩා සිය ගුණයක් හොඳයි. වැඩේ කියන්නේ සාමන්‍ය පාලකයෙක්ට වඩා මහින්ද දහස් ගුණයක් නරක වීම. එතකොට රනිල් සිය ගුණයක් අවුල් කියල ගණන් හදාගන්න වෙනවා.)

කොළඹ කේන්ද්‍රීයව සිටිනා අපට දේශපාලන සංස්කෘතියේ පුංචි පුංචි වෙනස්කම් දකින්නට ලැබුණද කොළඹින් ඈත තවමත් දේශපාලනිකව විශාල වෙනස්කම් පෙනෙන්නට නැත. කුමාර වෙල්ගම මැතිවරණයට ලක්ෂ හත්සීයක් වියදම් කළ බව ප්‍රසිද්ධියේ කීවේය. එය එජාපයේ සටන් පාඨයක් ලෙස පට්ට ගැසූ මුත් මා දන්නා එජාප හිටපු ඇමතිවරුන් දෙදනෙකුගෙන් එක් අයෙක් දැනට තක්සේරු කර ඇති වියදම ලක්ෂ අටසීයකි. තවකෙකුගේ වියදම ලක්ෂ හයසීය පණහකි.

'කතාව පොලීසිය ගැනය, මා කියන්නට හදන්නේ පහුගිය දිනයක හපුතලේදී සිදුවුණු පුංචි සිදුවීමකි.'

අගෝස්තු පළවෙනිදා රනිල් හපුතලේ රැළියක් සඳහා ආවේය. සංවිධානය බදුල්ලේ හරීන්ගෙනි. ලංකාවේ දේශපාලන රැස්වීම් වලට මිනිසුන් ගෙන ඒමේ ක්‍රමය බස් ය. මහින්ද මෙන් දුව දුව නොකළත් රනිල්ගේ කට්ටියද බස්වලින් මිනිසුන් ගෙන ඒම දක්නට තිබේ. හපුතලේ රැස්වීමටද බස් පැමිණ තිබුණි.

අප ඒ පැත්තේ ගියේ නිවාඩුවකටය. කොහේ ගියත් මාධ්‍යවේදී කෑල්ල (පුරවැසි කෑල්ල) සාක්කුවේය. හපුතලේ පැත්තේ මැතිවරණ නීති කැඩීම් අපේ කැමරාවල සටහන් විය. අඩියෙන් අඩිය මැතිවරණ නීති කැඩීම්ය. මහින්දලාගේ කාලයේ නිල්පාට වැරදි දැන් කොළපාටින් පෙනෙන්නට තිබේ. එජාපය සමඟ අවබෝධතා ගිවිසුම් අත්සන් කරන කොළඹ කේන්ද්‍රීය සිවිල් ක්‍රියාකාරීන්ට මේවා පෙනෙන්නේ අඩුවෙනි.

දඹේතැන්නේ සිට අප පැමිණි බස් එක හපුතලේ නවත්වාගෙන ඉන්නා අතරේ හපුතලේ නගරයේ යූඇන්පී කාරයන් පුරවාගත් සීටීබී බස් රථයක් වැහෙන්නට හරීන්ගේ සහ රනිල්ගේ පෝස්ටර් බැනර් එල්ලාගෙන යන ආකාරයද අපේ කැමරාවල සටහන් විය. බසයෙන් බැස සීටීබී බස් එක ළඟට ගොස් ජංගමයෙන්  පොටෝ කිහිපයක්ම ගෙන නැවත බසයට නැඟුණු මාව වටේ පිටේ සිටි අයගේද අවධානයට ලක්විය.

ටිකවේලාවකින් සිවිල් ඇඳගත් පුද්ගලයෙක් අප සිටි බස්රියට ගොඩවිය. 'ඔයා පොඩ්ඩක් බස්එකෙන් බැහැල එන්න.' නියෝගය මටය.

'ඔබතුමා කවුද? මොකටද මම බහින්න ඕන?'

'මම සීඅයිඩී එකෙන්, පොඩ්ඩක් ප්‍රශ්ණ කරන්න ඕන. ෆෝන් එකත් අරගෙන බහින්න.'

මට කාරණය පැහැදිලි විය. මේ රනිල්ගේ බුද්ධි අංශ ඔත්තුකරුවන්ය. බස්වල ෆොටෝ ගන්නා කොල්ලාට කතා කරන්නේ සද්දයක් දමා බයගන්වා ෆොටෝ ටික ඩිලීට් කරවා ගැනීමටය. අනිවාර්යයෙන්ම මේ නිලධාරියාව එවන්නට ඇත්තේ දේශපාලන බලයක් තිබෙන කෙනෙක් විසින්ය. සාමාන්‍ය තරුණයෙක් නම් මේ නිලධාරියාට අවනත වෙන්නට සිදුවනු ඇත. ආරක්ෂක අංශ එක්ක හැප්පෙන්නට බැරිය.

"මහත්තයෝ ඔයා නෙවෙයි පොලිස්පති ඇවිත් කිව්වත් මම මෙතනින් බහින්නේ නැහැ. මේ ෆෝන් එකේ ෆොටෝ තියෙනවා. අනිවාර්යයෙන්ම ඒවා මාධ්‍ය වලට, මැතිවරණ කොමසාරිස්ට යනවා, ඔයාට මොනවත් කරන්න ලැබෙන්නේ නැහැ. කරුණාකරලා මාව බස්සන්න ට්‍රයි කරන්නෙ නැතිව යන්න. නැත්නම් අමාරුවේ වැටෙන්න වෙන්නේ මට නෙවෙයි ඔයාට."

සීඅයිඩී මහත්මයාට ලැබුණු අනපේක්ෂිත උත්තරයක් මා සමඟ සිටි අනෙක් මාධ්‍ය මිතුරා අපේ අනන්‍යතාවය පැවසීමත් නිසා මගේ දුරකථන අංකය පමණක් ලියාගෙන එම නිලධාරියාට පසුබසින්නට සිදුවිය. ඉන්පසුව අපේ දේශනයකට සවන් දීමටද ඔහුට සිදුවිය.

පසුව සවස් වරුවේ මට දුරකථන ඇමතුමක් ගත් එම නිලධාරියා සිද්ධියට සමාව ඉල්ලමින් තමන්ගේ රැකියාවට හානියක් වන දෙයක් නොකරන මෙන් මගෙන් බැගෑපත්ව ඉල්ලීය. තමාව එව්වේ දේශපාලඥයෙක් විසින් බවද පැවසීය.

"පුතා ඔයාලා ඔයාලගේ ස්වාධීනත්වය ගැන කතා කරනවා, අපි තාමත් හිරවෙලා ඉන්නේ. ඔයාල දේශන දෙන්නෙත් අපට. මගේ නමත් එක්ක ඔය කතාව ගියොත් ආණ්ඩුව පැත්තෙන් තැලෙන්නෙත් අපි. අපි හැම පැත්තෙන්ම තැලෙනවා".

රනිල්ගේ ආණ්ඩුව ඉතා ලජ්ජා සහගත ලෙස හපුතලේදී පොලීසිය දේශපාලන අවශ්‍යතා වෙනුවෙන් යොදාගෙන තිබේ. අපි රනිල්ලාට තදින්ම කිව යුත්තේ මෙයයි.

'යහපාලනය මාස හයෙන් උදා කළා කියලා පංපෝරි ගැහුවට ඔහේට අගමැතිකම අරන් දුන්නෙත් මේ රටේ පුරවැසියෝ. ඔයාල අපට දෙන බම්බුවක් නැති බව දන්නව. ඔහේල අපේ සේවකයෝ, වැඩ හරියට කළේ නැත්නම් මහින්දව වගේ ඔහේවත් අපි අස් කරනවා.'